Des Johr is zum narrad werdn,
koa Vogerl duad ma singa hörn
weil da Schnää no so hoch liegt,
des is des Fruahjahr ganz verzwickt!
Seit boid fünf Monat is scho weiß,
des macht da Winta doch mit Fleiß!
Aussi kimmst ned aus deim Loch,
weil d’ Weiße Pracht zwoa Meta hoch
direkt vor da Haustür ruaht,
für uns und d’ Bleamen is’ ned guad!
Vor lauter Kältn i verzweife,
Holert di, Winta, nur grod da Deife!
Ui, oha, do, des hat er ghört!
Auf oamoi s bissal wärmer werd
und mit da Zeit, s war’n zwoa, drei Wocha,
is da Schnää in Bodn neikrocha.
Aa de Bleamal spriassn raus,
ois schaugt glei vui greana aus.
Ja, a d Vögl hörst jetz singa,
siehgst d Haserl auf da Wiesn springa.
Doch da Deife war des ned,
des war da Lenz! Nur bisserl z’ späd!

Copyright 2006 by B. Stoß