Kaum schaug i heid beim Fensta naus,
steht doch scho wieda oana drauß!
Der, den i moan, der hoasst „Schandarm“
und irgndwia is er scho arm,
weil bei dem schiachn Schnürl-Regn
derf si der fast gar ned regn!
Varuckt is scho, wia der da kauert,
unter am Busch auf d Autos lauert.
Weil wenn a Fahrer ohne Gurt
dann an eam vorbei fahrn duad,
nacha kimmt sei grosse Stund,
hoits Funkgerät sofort an Mund,
mit dem er am Kollegn steckt,
wer denn do koan Gurt olegt!
Nach hundat Metta ziagn’s den naus
und kassiern, i kenn mi aus!
Ah, wega mir derf da Schandarm
- schee langsam funkt a si aa warm -
no viele Stundn weida macha.
I konn über des nur herzlich lacha,
weil i gurt mi nach Vorschrift o,
so dass ma mir nix odoa ko!
I moan, i werd jetz aussi geh,
dann bring i eam a Tasserl Tee.
Vielleicht macht er dann a kloane Pausn
und lasst oan, zwoa Gurtmuffl sausn!