I war jetz grod beim ALDI drin.
Da siehg i, ja i glaub i spinn,
wia d Leut si um drei Hosn reissn,
bloß weil’s de im Prospekt anpreisn!
Grod dass se si ned mit Palettn
gegnseitig derschlagn hättn!
D Fetzn fliagn ummanand,
zwegs am Packl Voglsand,
auf des si zwölf auf oamoi stürzn
neun andre raffa um a Schürzn
und merka gar ned, wia von hint
a Zwoa-Meta-Lackl Anlauf nimmt,
voi in den Wühltisch einehupft,
dass glei zwoa Dutznd Leut weglupft,
nur wega oam Paar Kindersockn!
Sowos soid oan dann ned schockn!
I hoi nur meine Haferflockn.
Da foit ma auf der Hauffa Leut,
de wartn scho geraume Zeit
bis an da Kass zum Zahln kemma,
a hoibe Stund derfst da scho nemma!
Naa, sog i ma, de Zeit is z’ schod,
de Flockn aa da LIDL gegnüba hod!
I leg ins Regal des Packl zruck,
und schaug, dass i mi aussidruck.
Endlich drauß zum LIDL ganga,
nirgnds is a lange Schlanga,
am Parkplatz ned und an de Kassn!
„Dann konn i’s ja glei bleibn lassn!“
hör i mi sagn und geh hoam,
waar ganz schee fad beim LIDL worn…

Copyright 2006 by B. Stoß