Oiso guad, i gibs glei zua,
vom Fuaßboi vasteh i ned gnua
ois dass i aufmach groß mei Bappn.
Aba i muass nach Luft glei schnappn
wenn i des Drumrum mitkriag!
Aa wennts jetz glaubts, dass i recht liag
gibt’s doch einiges in dem WM-Valauf,
des stesst ma scho recht sauer auf.
Zerst hoassts, de deitschn Trikots, Fahndl
san a Ladnhüata im Einzlhandl.
Kaum zwoa Dog späda, wia a Wunda
is ausvakafft der ganze Plunda,
olle roasns no in Ladn,
woin so a dappigs Wimperl habn
des ma gschwind ans Auto zwickt
oda ois Gschenk de Enkerl schickt.
An Tonnaheisl und Balkon,
im Tierpark und am Waschsalon,
übaroi hams Flaggn gmoit,
Deitschland, Deitschland, schwarz-rot-goid !
Aufm Land und in da Stodt
is ma schließlich Patriot!
Oana sogor, a ned ganz Schlauer,
streicht an seim Kombi auf Dauer
d Radkappn in deitsche Farbn o,
obwoi er „Deutschland“ ned amoi mit „L“ schreibn ko!
Is scho guad, ihr habts ja recht,
de „unsan“ spuin ja aa ned schlecht!
I gfrei mi doch aa, wenns wieda gwinna,
d Fans nackad ummanandaspinna
und si patriotisch gebn.
Doch s gibt aa a wirklichs Lebn,
da gibt’s 5 Milliona Arbatslose
anstatt nur unsan „Miro Klose“
und d Mehrwertsteia, de geht nauf.
Schreibts des amoi auf d Fahna drauf,
gengts mittanand dann nach Berlin
dann hat des „schwarz-rot-goid“ an Sinn!