Boarische Gschichtn (A boor Gschichtln und Gedankn rund um ois!)

DES ZAMPERL VOM OPA

manitouman — 2008-06-03T19:57:00Z

Da Opa hod an Hund, an kloana,
do kannt ma manchmoi wirkli moana,
er waar a frecha, schwarza Deife
- und Recht habts, Leit, do gibts koan Zweife!
A Gwachs aus am Spitz und aus am Dackl,
des konn nur sei a wuida Lackl!
Nicki hoassts, oiso a Madl,
de gern moi einezwickt in d Wadl
oda nach de Finga schnappt,
weil vielleicht no a Radl Wurscht drobappt.
Mei, i mogs gern, s is wirkli so,
weil i mit ihr ois macha ko.
Sie foigt bei mia aa aufn Schlog
wenn i Sitz! und Stehbleibn! sog!
Drum dua i manchmoi aa mitleidn,
weil so arg is aa ned zum beneidn...
Warum, des derfts jetz lesn,
des is koa Witz, des is so gwesn!

Eines Tages ruaft mi d Oma o
ob i ned ganz gschwind kemma ko.
Da Hund waar auf da Polizei,
der breichad obhoin, und zwar glei.
I frog ned lang und fahr zur Oma,
de vazählt ma ganz benomma
wos si do ois zuatragn hod.
Beim Mittogessn, do hods gspannt,
dass wos mit eanam Hund sei kannt,
weil sunst waar a sofort do beim Essn
und daad ois andre glatt vagessn.
Da Opa fangt glei s Woana o,
weil s Zamperl übaroi sei ko
und vielleicht ganz alloa ins Jenseits geht
ohne dass er ghoifa hätt.
Oiso lassns s Essn steh
und dean sofort in Gartn geh,
suacha unta de Buschn und de Heckn,
wurscht san d Spinna und aa d Zeckn!
Sie schaugn in a jeds Eckerl nei,
irgndwo muaß des Viech doch sei!
Nach fast zwoa Stund kummt d Oma drauf,
dass da Opa beim Schnäppchenkauf
mitm Hund zum Kramer ganga is.
I war alloa, des woaß i gwiß!
sogt a von sich übazeigt,
doch d Oma scho aufs Radl steigt
und selba no an Kramer frogt,
der zu ihra jetza sogt:
Drei Stunden saß er vor meinem Laden,
und das bei ein, zwei Minusgraden!
So holte ich die Polizei,
die kam dann auch recht flott vorbei
und nahm das kleine Zittertier
mit auf das warme Revier!
Oiso saust d Oma wieda hoam mitm Radl,
ihr schnackln scho de Knia und Wadl,
und steckt am Opa jetz de Gschicht.
Do is a dann kasig wordn im Gsicht!
Jetz kumm oiso i ins Spui,
weil d Oma ja schlussendlich wui
dass i mit ihr den Hund obhoi
und a guads Wort dort für eana eilegn soi.
Mia fahrn oiso nauf auf d Wach,
doch des is hoid grod so a Sach,
weil s Zamperl is gor nimma drobn,
weils eam grod ins Tierheim nausgfahrn habn.
Auf gehts, pack mas, fahrn ma naus,
doch aussa unsam Hund is koana drauß!
Zuagsperrt is, mia stenga do,
ruaffa d Frau vom Tierheim o.
Sie kamert in a hoibn Stund
- mia stenga uns dawei d Haxn wund.
A Streifnwagn kummt auf oamoi,
und sperrt uns auf den Zamperlstoi.
Des Viech glanga fei Sie jetz o,
i schind mi mit dem nimma ro!
sogt bestimmt da Herr Schandarm.
Scho hupft ma da Hund in meine Arm,
geht koan Metta nimma weg.
Sappradi, ja do vareck!
heast wieda an Wachtmoasta sagn.
Und i hättn scho beinah daschlagn,
weil a so bäs und zwieda gwesn is!
Dann grinst a mi o, mitm frechn Gfries.
Scho sans wieda furt mit eanam Karrn,
doch mia kenna no lang ned fahrn,
weil d Tierheim-Dame kummt ja no,
doch de is aa recht boid scho do,
mia ratschn no kurz, dean uns bedankn,
dann duad da Hund no Wassa tankn
und hoam gehts, wo scho da Opa wart
und vawoant ausm Küchnfensta starrt.

Endlich is sie wieda da,
die hoib dafrorne Bestie vom Edeka.

GELL, HOS, DO SCHAUGST !!

manitouman — 2008-03-22T17:51:00Z

Jawoi, jetz is wieda so weit,
scho is do, de Osterzeit!
Aba, liaba Osterhos,
du werst di wundan wia grod wos,
weil des Ostern, des du kennst
heid mit am andan Nama nennst!
Happy Easter steht auf Kartn
und auf große Schuidl aa im Gartn
von meim Nachbarn, dem Klaus-Jörg.
I muaß da sagn, a Meistawerk!
So scheene Farbn hod a gnumma,
dass ned amoi mehr d Vögl kumma!
Neonpink und Giftig-Grea
- da Anblick foit ma wirkli schwer -
Blass-Violett und Arg-Grell-Blau,
so hod a gmoit dei Hosn-Frau!
Am Klaus-Jörg sei Oide, d Marie-Claire,
kimmt grod mit am Nest daher,
in des soist du de Oarr nei legn.
Glaubs, sowos host du no ned gsegn!
Weil mas hoid des Johr so hod,
is as Nest aus Stachldroht,
umwicklt mit eigfarbte Damenbindn!
Sorry, konnte grad nichts andres finden!
ruafts ummi, weil i anscheinend grod so stier,
mir hängt ja aa d Lätschn owe bis an d Knia!
S Oster-Lampal, sicha ned zu deina Freid,
hod koan Blooz mehr weit und breit.
Dafür hams eanam Pitbull, genannt Baron,
a weiß Jopperl drüberzogn!
Da Woif im Schafspelz triffts pfeilgrod,
wo er ja scho manchn Postbot grissn hod.
Obacht, Hos, jetz hoit di fest,
jetz befüllns des schiache Nest!
Arma Hos, des is ned schee,
do dean oam wirklich d Augn weh!
Plastik-Oarr mit Warzn, Heandl!
So liebt es Celine (as Nachbars-Deandl)
sogt d Nachbarin, und ihr Oida, i sog Klaus,
moant: Das sieht ja dufte trendy aus!
Gell, Meister Lampe, des san Sacha,
do vageht da glei as Lacha!
Aba wenn mia zammahoitn,
schee brav unsare Händ zammfoitn,
und da Bädrus uns dann siehgt,
er uns vielleicht an Schnee ro schickt!
An Metta hoch, bis Mitte Mai,
dann is mit dem Elend aa vorbei!

DA WUUZL-AUTOMAT

manitouman — 2007-08-11T08:28:00Z

Mei Frau und i, mia sagns eich glei,
mia kaffa gern beim Aldi ei.
Da kriagst fast ois zum Trinka, Beissn,
aa as Klobabia für . d Hygiene.
Jetz hams kürzli gstellt parat
zwoa Flaschn-Wuuzl-Apparat
für den Plastik-Flaschn-Haufa,
den de Leut täglich wegsaufa.
D Flaschn schiabst nei, Drum für Drum,
dann draaht des Gerät de oanzln um,
druckts und wuuzlts kurz und kloa.
De hod fei sauba wos zum doa,
de Maschin, der Zammdruck-Grampn!
Obndrauf san no drei Lampn,
zwoa san gelb, und oane rot,
damit ma an Übablick hod
wann der Kastn is dann voi.
Wenns olle leuchtn is zur Stoi,
de Aldi-Dame und laart eam aus,
fahrt de Flaschn-Leichn ins Laga naus.
So, mitm Erklärn is aba gnua!
I oiso in den Apparat nei dua
meine oidn Aldi-Flaschn,
ned weniga ois wia zwoa Taschn
randvoi gspickt bis unter d Schlaufn
- ganz schee vui, wos mia so saufn
Da saust von hint a andra Mo
wia von da Tarantl gstocha o
und wart scho drauf dass i mi druck,
doch i hob no etwa neinzehn Stuck!
Der schnauft mi scho ganz narrisch o,
obs i ned a bissal schnella ko!
Aba i lass mi ned treibn,
des konn a si hinta d Ohrn schreibn!
Mei, i konn mi ned darenna,
langsam fangt a o zum Flenna!
Endli bin i doch so weit,
- vaganga is a scheene Zeit -
dann frog i eam, warum a ned
an den andan Kastn geht,
der bloss oamoi ums Eck rum is!?
Ihr hätts sehgn miassn sei Gfrieß,
des eam jetz bis an Bodn schlagt!
I hob zu meina Frau scho gsagt:
Trink ma schnell de nächstn Flaschn zamm
dass i wieda an den Apparat hi kann!

SCHEENE AUSSICHTN

manitouman — 2007-07-29T07:06:00Z

Heid bin i wieda moi in d Berg nei ganga,
a bissal frische Luft eifanga,
a paar scheene Buidl schiassn,
zuaschaugn, wia de Bleamal spriassn
und wos für d Gesundheit doa.
Doch da war i ned alloa!
D Amis mit de Leda-Klapperl,
d Jelena mitm Tschechn-Kapperl,
da Guiseppe, frisch aus Rom,
war natürli aa da drobn!
Da Quing-Chang mit Frau und Kind
roaffen wia da Wirblwind
von oam Gipfe num zum andan!
I glaub, de woin uns unter-wandern!?
Aussadem san do no Preissn,
de Stoana an Berg nunta schmeissn.
D Holländer ned zum vagessn,
de d Weißwürscht in da Semme essn
und a Paarl aus Eisenach,
de woitn, dass i von eana ä Footo mach.
Doch nach am Marsch von fast 4 Stundn
hob i a ruhigs Platzerl gfundn
wo ma gänzlich ungestört
des Krächzn von Kolkrabn hört.
Foisch! Do hob i mi glatt brennt,
kemma doch ned zwoa ogrennt
und hean des Greisch tatsächli aa!
Sie sogt: Ach Jupp, watt quakt denn da?
Er moant drauf: Datt wird n Frosch jewesen sein!
Da platzts aus mir naus; Ja prima, fein!
Schick di, schmeiss dei Kamera oo,
des is nämli da erste Frosch, der fliagn ko!
Mei, de Gsichta hätts oschaugn miassn,
ehrlich gsagt, de warn zum Schiassn!
S is doch imma wieda schee
wenn i amoi an Berg nauf geh!

AM SEE

manitouman — 2007-07-21T18:15:00Z

Heid hods wieda so a Prüglhitz
dass i glei wia a Büffl schwitz.
Do werd i mi friahra aus da Arwat zwicka,
mi blitzschnell zum Wassa schicka!
A Rundn schwimma duad gwiss guad,
des kühlt as Hirn und aa as Bluad.
Oiso hoam, d Bodhosn übagstroaffed,
dann werd mitm Radl zum See higroaffed!
Aufm Weg hi werd ma klar
dass i mit dem Einfoi ned alloa war.
D Zufahrtsstrass mit Autos voi,
zuageh duads wia im Hehnastoi.
Wia d Ameisn siehgst d Leit rumsausn,
schee langsam kummt ma do as Grausn!
S Radl stell i hint ins Eck,
koan Kilometta vom Ufa weg.
Ganz langsam schleich i nach, der Hordn,
bei dem Tempo is gwiss scho manche schwanga wordn!
Nach 20 Minutn siehg i eam, an See,
der Marsch derfat fei ruhig schnella geh!
Ah, da flacka scho de erstn Leit,
jetz is sicha nimma gor so weit.
500 Metta bis zum Strand,
mei Taschn schneidt si ei in d Hand.
Dann kumm i hi zur Liegewiesn,
nur mitm Platz is recht besch.
Beschaulich is des ois fei nimma,
koa Red mehr von a Rundn schwimma,
weil der Schwung an Badegäst
gibt ma eingli scho an Rest!
5000 Körpa in da Lättn,
dazwischn schwimmt aufm Wassa d Fettn
von da Sonnakrem, de de Bärn beim Badn valiern
- mir brennts schee langsam auf as Hirn!
Von dem Gros erkennst koa Grea
Weil durch des Badegäste-Meer
du nur no auf Haut und Foitn schagst,
dassd aufn erstn Blick fast glaubst
du bist in a Walross-Kolonie.
I mächt doch bloss zum Wassa hi!
Üba Fleischberg muass i hupfa,
durch an Haufa dürre Heigeign schlupfa.
Am Ufa bin i endli nach 40 Minutn Hürdnlauf,
da ziagn sakrisch dunkle Woikn auf.
Nei in d Suppn, aba gschwind!
Scho brausta los, da bäse Wind.
Im Zickzack schwimm i naus an See
- zwoa Minutn warn echt schee!
Weils dann wia aus Kübln obisoacht
- und drauss aa scho mei Gwand aufwoacht
Auf oan Schlog blitzts und donnerts schwaar,
d Liegewiesn werd ruckzuck laar
und i hock alloa in dera Schmierfuim-Lättn,
mei Gwand is eh nimma zum Rettn.
Waschlnoos, mit stramme Wadl
geh i in 8 Minutn zu meim Radl,
fahr hoam und braus ma dort des Öl dann ab,
wos für a scheena Badetag!

Maxl, der Kundenschreck

manitouman — 2007-02-13T18:13:00Z

Furchtbar lang is jetz scho her,
da war i in Bruck zur Schreina-Lehr.
An Nama mächt i eich beim bestn Wuin ned nenna,
aba noch dera Gschicht wern eam scho no a boor von de oidn Brucka kenna!
Jednfois hods dort gebn an Bernhardina,
der war für an Hund a Trum Schlawina!
Ghoassn hod des Mistviech Max,
war a sakrisch bissigs Gwachs.
Mia hod a noch am Viertljohr
mit Würschtl fuadan nix mehr do,
im Gegnteil, der is zu mia
wia a Welpn, in da Friah
daher ghupft, hod si an mi druckt,
woit aa schmusn wia varuckt!
Untadogs war a dann drinna
in seim menschnsichan Zwinga.
Den hods aa braucht, denn wia scho gsagt,
da Maxl hod an Deife ghabt!
Weil an bsondas scheene Dog
war a heraus aus seim Vaschlog
und is gflackt schee brav beim Moasta im Büro
ois wia wenn a koa Wasserl trübn ko.
Des ändat si in dem Moment
wo a Person, de a ned kennt
oda aa ned kenna mog, zur Dia reikimmt
und si ned so, wia er des moant, benimmt.
Der greift aba ned so o, wia si des für an Hund ghört,
naa, liabe Leit, da liegts vakehrt!
Do is nix mit Knurrn und Belln,
Zähn herzoagn und Hoor aufstelln.
Zerst werd moi gschnufed, dann werd ghorcht,
dann so do wia wenn ma soacht,
draamhappert gschaugt, nomoi higlegt,
wia wenn oam übahaupts nix aufregt.
Doch ganz gmiatli, gor ned schnell,
imma näha an de Stell,
werd zu dem Mentscha ummitrappt
und wia da Blitz, ruck zuck, zuagschnappt!
Glei is do a Fetzn Fleisch rausgrissn,
werst von dem Mordstrum Sauviech bissn!
A lauda Schroa, dann roast da Nächste wieda naus,
da Chef schaugt wiedaholt ganz kasig aus,
hoit den Hund fest am Hoisbandl.
Des Riesn-Viech und s Zwetschgn-Manndl,
so hängt da Moasta am Maxl dro,
er oam scho richtig leid doa ko.
Mitm Vabandskastn i aussi rumplt,
specht, wo irgndwo oana humplt,
si am Orsch oda as Wadl hoit
- oda si am Bodn roid.
So lang da Chef mitm Hund no schimpft
frog i den Valetztn: San S gega Tetanus gimpft?
Währnd i vaarzt und da Max bellt
werd vom Moasta a Scheck ausgstellt.
Und obwoi mas ned erwartn daad
macht der de meistn Opfa staad!
So is nur a Frog der Zeit
bis de nächste Kundschaft Aua! schreit.
Doch dann, i hob Urlaub ghabt,
hod da Maxl nimma gschnappt.
Bei eam hams an Krebs festgstellt.
do hamsn, dass er si ned quält,
mit a Spritzn in Hunde-Himml gschickt
- wo a jetz vielleicht jedn Dog an Petrus zwickt!
Pfirti Max, du bäsa Deife!
Aba mia ham uns mögn, do gibts koan Zweife!

Saubua!

manitouman — 2007-02-07T18:02:00Z

Letzts Moi bin i mit meine Spezln so zum Redn kemma
wia si eanare Schraazn so benemma.
So furchtbar sans, de Buam und Madl,
vieregricht ghörn eana d Wadl!
Doch bis ma gschaugt ham is passiert
mia ham üba unsa eigns Benemma lang dischkriert,
wia mia ois Kinda gwesn san.
Do kummt fei auf a Hauffa Schmarrn,
an dens D dir scho boid nimma denga traust,
dir scho beim drüba redn graust!
Von mia, da konn i gnua vazähln,
ja, i dua mi dera Tatsach stelln,
dass i aa a rechta Saubua war,
a durchtriebna ganz und gar!
Do host auf da Eisnbahn-Trassn
Pfennigstückl zadrucka lassn,
am frechn Bruada s Zeig nochgschmissn
dass wieda hod a Glosscheibn zrissn.
Mit de Spezl in da Nacht
oft gnua Klingputzn gmacht,
Geldbeitl hi an d Anglschnur,
und soboid si oana bucka duad
wegzogn und schnell davo glaffa!
Zwischnnei mit a boor Gloifen raffa,
Ziaglstoa auf Ratzn schmeissn,
in da Freinacht fremde Leit vor d Hausdia sch
Schneckn mitm Radl zamfahrn,
Deandl an de Hoor rumzarrn,
Kracha in d Spuizeigfliaga nei
- de zreissts furchtbar sakrisch fei!
Ob ma an Strom in da Lampnfassung drin aa gspürt
hob i freille aa ausprobiert!
I sogs eich, do hot si sauba wos grührt!
Zwanzg Sekundn unta Strom,
do hob i ghabt an Schutz von ganz weit obn!
D Zähn ins Obakiefa gstessn,
higfoin und a Band am Haxn grissn.
Ois kloana Bursch alloa zum Luurn ganga
ins Viechgschäft zu de wuidn Schlanga,
und d Mama hod mi wieda gsuacht
- und dann aa dementsprechnd gfluacht!
Nach da Schui oft bis auf Nacht
aus Laubheiffa Sprunggruabn in Treppnabgäng gmacht,
mitm Brennglasl Ameisn vabrennt,
oft gnua mitm Radl darennt,
Weitsprung von da Schaukl macha,
mit Schwung in Zwetschgnbaam nei kracha,
am Bruada zwischnnei an Schoas hilassn
und eam ned in Ruah aufs Heisl lassn.
Jednfois is ganz schee vui
wos i do heit beichtn wui.
Drum denkts aa ihr an eia Kindheit zruck
und gebts eich dann wia i an Ruck,
sagts eich, dass mia de gleichn Deifen warn
wias unsre Kinda heitzdog san!

Oiwei bläda

manitouman — 2007-02-06T19:34:00Z

Wenn i mi umschaug glaub i gor,
de Leit ham heutztag gnua andas vor
ois amoi s Hirn einzumschoitn.
Manche dean si so vahoitn
wia wenns a bissl damisch waarn
und s Hirn fürs nächste Lebn sparn!
Im Kühlschrank vareckt wegam Stromausfoi as Essn,
dawei hod de anda Schicksn ganz vagessn
dass bei minus fuchzehn Grod de Speisn
draussn no vui länga hoitn - weils vaeisn!
Oda drin im Supamarkt,
wenn wieda wer mittn im Weg sei Wagl parkt
dass D nimma zruck und viere kummst
muasst schaugn, dass D ned selba aa vadummst!
Denn spätestns vorn an da Kass
schlogt mei Stimmung langsam um in Hass.
Denn macht a neie Kassn auf,
dann legns eana Glump ganz hint aufs Bandl nauf
und wartn bis' ganz viere roit
- wo ma de zwoa Trümma dann mit da Kartn zoit!
Des dauat freille scho sei Zeit,
weil d Geheimzahl is im Hirn ja ned bereit.
Nach fünf Minutn übalegn
zoins dann doch mit am Zwickl - wos für a Segn!
Andre ham an eanare Karrn im Februar
no Sommaroaffa, is ja klar!
S is im Winta ja a Seltnheit
dass vielleicht doch amoi schneit!
Wenn dann aa no d Deitschland-Fahna an am Amt
gold-rot-schwarz an da Fahnastanga prangt
- de hams ghängt oafach vakehrt rum auf -
hoff i, i wach wieda aus dem Alptraum auf!
Dann gibts vielleicht wieda Leit, de logisch denga,
lesn, schreibn und aa boarisch sprecha kenna!

Checkst du des?

manitouman — 2007-02-06T19:31:00Z

Is eich des aa scho passiert,
dass ma de Sprach von de Junga ned kapiert?
De ham eana eigns Vokabular
und du stehst wia a Trottl da
weilst vastehst koan oanzgn Brocka!
Drum woit i a weng nachtarocka,
hob gfrogt d Neffn von meina Frau.
Wia de redn is a Schau!
Manche Sachan san voll phat,
i oafach bärig da gsogt hätt.
Statt Pfirti sagns Hau dich rein,
ends geil steht für pfundig, fein.
A Blädl is heutztag a Spast,
ganz schee arg hoaßt total krass!
Servus Spezi heit Hi Alta hoasst,
a Checker bist, wennst heit wos woasst!
Domois waars s Gscheithaferl gwesn,
a Fuck-Face war a Schiacha Bäsn
oda a greislicha Grampn!
Bitch war amoi a Schnoin, a Schlampn.
Wos ma friara aufgschwanzt hod, des werd gepimpt,
frogst selba noch wennst moanst, dass des ned stimmt!
Da Honk, des waar da Gmoadepp gwen,
statt zuawageh duad ma auf der Matte stehn.
Bist agro, dann bist sauba belzig, mächst glei raffa,
im Center shoppen war beim Krama kaffa.
Birne wegknallen moant an Kragn zuaschüttn,
Hoiz vor da Hüttn war früha, heit ham de Chickas Tüten!
So kannts endlos weidageh,
doch ihr daads mi ned vasteh!
Wer woaß, vielleicht kummt amoi de Zeit,
wo mei Urenkl zu mir her kreit
und zu mir sogt: Wolln wir beide bayrisch lernen gehen,
damit mich meine Alten auch nicht mehr verstehn?!

De staade Zeit

manitouman — 2006-12-27T10:14:00Z

Jetz werdns wieda bläd, de Leit,
es is wieda Weihnachtszeit!
Do roasns, renna ummanand!
I hob no koa Gschenk zur Hand!
I muaß mi tummln, hob koa Zeit!
Weihnachtn is nimma weit!
A ganz a gstumpferts Zwetschgnmanndl
huscht ganz flott in Spielwarn-Handl
weil er braucht für seine Deandl
a Action-Toy mit krumme Heandl,
des möglichst no auf englisch sogt,
dass da boid as Kreiz abschlogt!
De anda Frau, anthroposoph,
braucht unbedingt no schnell an Stoff,
mit dems ihrm erleuchtetn Mo
selba a Krawattn zammnahn ko!
Und ihr Bua, der freche Schraaz
dappt mit seine Pratzn voller Baaz
an de Gschenka von a Oma rum.
Doch de schaugt nur bäs und stumm
auf ihrn Oidn neba ihr.
Der brummt Mia braucha doch koa Gschenk-Babier,
mia ham a Zeidung no dahoam,
des werds für des Glump scho doan!
Des is a Glump, do hod a Recht,
nämli a lila Plastik-Specht,
der mit de Augn rolln ko,
aba des wars hoid dann aa scho.
A andra Mo, i schätz a Italiena,
des is wirkli da ollascheena,
der hod a riesngroße Puppn!
I mog am liabstn Zwiefe-Suppn!
schreit des Ungetüm ganz krachad!
Wenn de bloß ihr Mei zua machad!
Hob i a Glück, i bin jetz dro,
frog: Habts ihr Kindabiacha irgndwo?
Da lacha d Leut, sagn Guada Mo!
Biacha san doch total out!
Sie braucha wos, des furchtbar laut
schnacklt, surrt und schäppad!
Do bin i naus, des war ma z deppert,
und hab für unsa Luisa Gschichertl gschriebn,
so is no a bissl was von der staadn Zeit übrig bliebn.

D Windln

manitouman — 2006-12-27T09:09:00Z

Mei liaba Schwan, jetz gehts fei los,
unsa Kloane, de werd groß!
Nix mehr is mit liegn und tringa,
na, jetz fangts aa scho sauba o zum stinga!
Do werd d Windl voi, bis nauf zum Rand,
manchmoi aa da Rest vom Gwand
und sie grinst und wart nur drauf,
bis oana macht des Hoserl auf!
Do schiasst oam dann a Gruch in d Nosn,
dass moanst, du konnst as ned dablosn!
Mei, Mo, an des muasst di gwohna!
mi duad mei Frau einfach ned schona.
Guad, hau mas weg, des oide Gwand,
nehma hoid wos Neis zur Hand!
Doch genau in dem Moment,
wo si da Orsch von da oidn Windl trennt,
machts oamoi Pffft und oamoi Platsch
- scho hamma wieda do an Matsch!
D Wicklauflag ganz daschissn,
und de kloa Maus, ois daads des wissn,
jauchzt mi mit runde Augerl o
weil i ja wieda wischn ko!
Endlich is sauba, i steh im Schwoaß,
lass si ned zum Schluß an scheena Schoas!?
Mit Material, des is ja klar,
waar a Wunda wenns anders waar!
Oiso nomoi sauba macha.
Da plätscherts und a kloane Lacha
macht de frische Hosn schwaar.
Ja sog amoi, bist denn du jetz no ned laar?
Endlich gehts, i ziag ihr o des neie Gwand,
hebs auf, da brodlts in da Hand!
A Schoas! denk i ma und hoit mei Mei,
den schnaufst fei jetza selba ei!

Zu dritt

manitouman — 2006-10-06T10:54:00Z

Graublau, vaschmiert und voller Foitn,
so duads uns d Hebamm entgegn ghoitn,
des kloane Menschal, narrisch siaß!
Sie is vom Kopf bis zu de Fiaß
a wirklichs Wunda, grod raus gsogt,
do wo ma si tatsächli frogt
wia des ois so funktioniert
dass aus am Oarr a so scheens Deandl wird!
Jetz werds da Mama aufn Bauch nauf glegt,
und mia ois ersts d Zunga aussi gtreckt!
Wia die Mama!denk i ma,
doch d Steffi denkt Wia da Papa!
Vagessn san oi de Strapazn,
mia san ganz valiabt in den kloan Schraazn,
kennas oiwei no ned fassn
dass mia uns jetz na Eltern nenna lassn!
Sie schaugt mi o, i moan dass lacht,
de woass scho genau wia ma des macht
dass mi umman Finga wickln duad!
Koa Wunda, is ja aa ganz Fleisch und Bluat
von da Steffi, meina Frau!
Sie is und bleibt a echte Schau,
weils i nur bewundern ko für so vui Kraft
dass ma so a Geburt schafft!
D Frau Dokta sogt Guada Mo,
Sie san jetz mitm Nablschnur-Durchschneidn dro!
I nimm de Schaar, zerschneid den fingadickn Fadn,
dann derf i s Wuzerl aa scho badn!
Ganz vorsichtig und voi Respekt
werds von mir ins Wasser gsteckt,
des ihr offnbar recht gfoit
weils ned plärrt und ganz staad hoit.
I tupfs ab und bin ganz froh,
weil an ihr is scho ois dro
wos a Kinderl habn muaß.
I kitzls glei a weng am Fuaß,
dann gehn ma zur Mama zruck.
Dort probierts scho de erstn Schluck,
wos aa jeds Moi bessa geht,
ja, unsa Bohna is ned bläd!
So is gschafft da erste Schritt
und mi san ab sofort zu dritt!

Neigierig

manitouman — 2006-10-06T10:53:00Z

Ja, unsra Kloana pressierts ned,
scho ganze fünf Dog drüba steht
übern Termin zur Entbindung.
I konns vasteh, ´s is Übawindung,
dass ma aus der scheena Wärm
naus muaß in d Welt, so koid, voi Lärm!
Oiso dean mia sie ned treibn,
werd scho ned für imma drinna bleibn!
Da san mei Frau und i ganz locka,
doch andre scho auf Kohln hocka
und boid stündlich uns oruafa!
Duads jetz scho endli aussischluaffa?
frogt de oane Oma scho.
Is d Gwendolyn denn no ned do?
frogt da Schwoga von da Steffi.
Wos is denn jetz mit meina Neffi?
Hirsch, des hoasst Nichti! sog i zu meim Bruada.
Vorbei kummt no a Freind, a guada.
Und, wia schauts aus?
Pech ghabt, de wui no ned naus!
konn i nur sagn und lass eam geh,
weil i muass scho wieda Red und Antwort steh!
D Nachbarin saust nämli grod daher.
Hamma scho an Nachbarn mehr?
Duad ma Leid, ois is beim oidn,
aba i dua mi ganz gwiss moidn!
gibts von mir da bloß zum hörn.
Host Recht, mei Kloane, lass di ned störn!
Lass di ned treibn und ned hetzn,
mia wern di scho no friah gnua in d Welt nei setzn!
Jetz duasd erst no gscheid ausbaacha
und späda um so lauda lacha!

Gemeinsam

manitouman — 2006-09-30T06:50:00Z

Wenn i mit meine Spezln redn dua
dann is ma manchmoi wirkli gnua.
Bsondas wenns um an Partna geht,
is des zwischnnei a Gfrett!
Da oa sogt: Stell da vor, mei Maus,
haut beim Frisör achzg Euro naus!
Hint und vorn glangts Pulva ned
weil sie so gern hoid Strähnchen hätt!
Wennst sie dann triffst is grad umkehrt,
und si des dann so anhört:
Glaubst, wos mei Oida Pulva braucht,
weil der oiwei ois verraucht!
Da konn ja s Geld uns nia ned glanga,
der raucht im Monat gwiss drei Stanga!
Da nächste sogt: Glaubst as, mei Trutschn
lasst mi jedn zwoatn Dog bloß Nudln lutschn
weils nix andas kocha ko!
Mein Gott na, mei Mo!
sogt sei Frau a bisserl späda
- und ziagt dabei richtig vom Leda -
der is so hoakli, dem schmeckt nix,
aussa d Spaghetti von Miracolix!
Machst eam Schnitzl, Würscht, an Brei,
vaziagt a bloß ganz schiaf sei Mei!
De anda flüstat mia ins Ohr:
Sog ma, wos soi i bloß doa,
da mei, der head ma nimma zua!
Moanst, i hätt amoi mei Ruah?,
sogt er, de Frau, de redt de ganze Zeit,
des is a Wahnsinn, wia i leid!
Wieda oane schimpft: I hobs scho schwer,
meina is so oft in da Feiawehr!
Grod dass i eam no a bissal seh
bevor i ins Handball-Training geh!
Ah, da hammas doch scho wieda!
Des san doch oiwei de selbn Lieda!
Olle andan machas foisch, nur i machs richtig!
Dawei is doch s GEMEINSAM wichtig!
Sowos gibts bei meina Frau und mir gor ned,
weil ma si hoid blind versteht!
Mia redn vui, mia hörn uns zua,
mia lassn uns aa moi a Ruah,
und zoagn uns, dass ma uns aa braucha,
koana von uns zwoa duad raucha,
und aa kocha dean ma mittanand,
des is für mi ois Mo koa Schand!
Des solltn liaba alle macha,
dann daadns olle üba solche Sacha
bloß no ganz miad und mitleidig lacha.

Da Banker

manitouman — 2006-07-30T11:52:00Z

Zefix, jetz is doch amoi passiert,
mi hod si mei Bankberater glei kassiert
wia i in mei Hausbank eineganga bin.
Mach ma doch glei moi an Termin,
mia habn scho so lang nimma gratscht!,
dann bin i gstingat hoamwärts ghatscht
i hob ja gwusst, wos der ois wui!
Des is doch imma s gleiche Gschpui,
zerst blosns da ins Ascherl Zucka
und dann woins da a Versicherung aufdrucka!
Do gehts dann mit da Hausrat o,
weil jeda de guad braucha ko,
dann redt ma doch no üba d Rente,
vom Riester, ja a jeda kennt de!
Am bestn is des ois dynamisch.
Glaubst, da werst mit da Zeit damisch!
San Sie privat a guad abdeckt,
wos is, wenn amoi da Karrn vareckt?
Braucha S ned doch an Kredit?
So gehts dann, ganz Schritt für Schritt.
Was haltns denn von Sparzulagen,
derf i Sie nach Erspartem fragen?
Mei, was Bsonders i no hätt,
von uns a Aktien-Paket!
Der Gewinn, der is gesichert,
und wenn ned, dann san S versichert!
Weil Sie a so a guada Kunde san,
bietn ma Eana d Goldne Visa an!
Lebnsversicherungen san nix mehr,
jetz muass wos ganz wos andas her,
des is effizienter und famos!
Sei Hemad is vom Schwitzn nooß,
weil der si a so einisteigert!
Zum Schluß hob i doch ois verweigert,
wias hoid imma bei uns is!
Denn des oane, des is gwiß,
i wui, dass i von meim bissl Lohn
aa no mei Familie fuadan konn!